Më datë 25 maj 2026, Instituti Kombëtar i Fizikës organizon konferencën “Nga Gigabota te grimcat elementare, gjithçka lëviz e vetorganizohet: kjo është Fizika”, me rastin e botimit të kolanës së librave të Akad. Prof. Rexhep Meidanit: Universi, Përbërja dhe Evolucioni i tij; Kategoria e Materies në Fizikë; Kategoria e Hapësirës dhe Kohës; dhe Kategoria e Lëvizjes.

Përveç folësve të ftuar, kërkues të rangut të lartë nga brenda dhe jashtë vendit, një seancë e veçantë do t’u kushtohet studentëve të doktoraturës, të cilët do të kenë mundësinë të prezantojnë një abstrakt të zgjeruar mbi temat e kërkimit në të cilat punojnë.

Ftohen të marrin pjesë të gjithë studentët e doktoraturës që udhëhiqen nga profesorët e Fizikës. Konferenca do të përmbyllet me botimin e një libri abstraktesh të punimeve të prezantuara.

Më 31 janar dhe 1 shkurt 2026, në Departamentin e Fizikës, Fakultetin e Shkencave të Natyrës, u zhvillua me sukses kursi i trajnimit “Exoplanets for Education – Exo4Edu”, në kuadër të programit Erasmus+ KA2, ku Universiteti i Tiranës është partner. Trajnimi mblodhi pedagogë dhe mësues nga qytete të ndryshme të Shqipërisë, përfshirë Tiranën, Shkodrën, Elbasanin, Durrësin, Lezhën, Korçën, Laçin dhe Gramshin. Ata u njohën me konceptet bazë të ekzoplanetëve, metodat e zbulimit të tyre, zonën e banueshme dhe mënyra praktike për integrimin e këtyre temave në mësimdhënie.

Programi përfshiu leksione, punë praktike, eksplorimin e bazave të të dhënave të ekzoplanetëve, përdorimin e mjeteve statistikore, diskutime mbi projektin Exo4Edu dhe vrojtime astronomike me teleskop. Kursi u mbyll me reflektime përfundimtare dhe rëndësinë e vazhdimësisë së bashkëpunimit, përfshirë mundësinë e binjakëzimit të shkollave shqiptare me ato partnere nga Franca, Rumania dhe Portugalia, me synimin për integrimin e astronomisë moderne në arsimin parauniversitar.